Հայ կոմպոզիտոր, ալտահար, Հայաստանի արվեստի վաստակավոր գործիչ Ռուբեն Ալթունյանը ծնվել է 1939թ. մարտի 31-ին: ՀԽՍՀ ժողովրդական արտիստ, խմբավար Թաթուլ Ալթունյանի որդին է, ՀՀ արվեստի վաստակավոր գործիչ Ժիրայր Ալթունյանի եղբայրը։ Ավարտել է Երևանի Չայկովսկու անվան միջնակարգ երաժշտական տասնամյա դպրոցի ջութակի բաժինը։ 1959-1964 թթ. սովորել է Երևանի Կոմիտասի անվան պետական կոնսերվատորիայի ալտի բաժնում, 1965-1970 թթ.՝ Երևանի Կոմիտասի անվան պետական կոնսերվատորիայի կոմպոզիցիայի բաժնում։ 1969 թվականից դասավանդել է Երևանի Կոմիտասի անվան պետական կոնսերվատորիայում, որտեղ 1998-2006 թթ. եղել է լարային քառյակի ամբիոնի վարիչը։ 1970 թվականից անդամակցել է Հայաստանի կոմպոզիտորների և երաժշտագետների միությանը։ 1974-1977 թթ. աշխատել է Հավանայի կոնսերվատորիայում։ 1983 թվականին հիմնադրել և ղեկավարել է Հայաստանի գուսանական և ժողովրդական երգի համույթը։ 1987-1990 թթ.աշխատել է Թաթուլ Ալթունյանի անվան երգի և պարի պետական անսամբլի գեղարվեստական ղեկավար և գլխավոր դիրիժոր։ 1983 թ. արժանացել է ՀԽՍՀ վաստակավոր արտիստի կոչմանը, 2001 թ. արժանացել է Հայաստանի Հանրապետության Պետական մրցանակի, 2009 թ. շնորհվել է Հայաստանի Հանրապետության արվեստի վաստակավոր գործչի պատվավոր կոչումը, 2009 թ. պարգևատրվել է ՀՀ Մշակույթի նախարարության ոսկե մեդալով: Մահացել է 2021թ. նոյեմբերի 21-ին` 82 տարեկանում: